Kryeministri i Maqedonisë së Veriut, Kristijan Mickoski dhe zëvendësi i tij i parë, Izet Mexhiti, janë takuar sot në Londër të Britanisë së Madhe me presidentin ukrainas Volodymyr Zelenski.
Takimi është realizuar në kuadër të Samitit të Komunitetit Politik Evropian (KPE), i katërti me radhë që nga promovimi i këtij unioni si një platformë më gjithëpërfshirëse e Evropës në vitin 2022.
“Në takim theksova mbështetjen e qartë të Maqedonisë për Ukrainën dhe popullin ukrainas dhe theksova se ata mund të llogarisin në miqësinë tonë edhe në të ardhmen. Maqedonia dhe populli maqedonas janë një komb human dhe simpatizojnë këto sfida të vështira historike dhe pasoja të paparashikueshme. Marrëdhënia jonë bazohet në miqësinë e vërtetë nga e cila lindin parimet, vlerat dhe mirëkuptimi”, ka shkruar Mickoski në profilin e tij në Facebook.
Për takimin njoftoi edhe yëvendëskryeministri i parë në Qeverinë e Maqedonisë së Veriut, Izet Mexhiti.
“Diskutuam çështje kyçe që prekin rajonin tonë, përfshirë sfidat e sigurisë dhe perspektivat, për vendet tona. U ndalëm te integrimi në strukturat euroatlantike, që synon të sigurojë një të ardhme më të begatë dhe më të sigurt për qytetarët tanë. Po ashtu, diskutuam për domosdoshmërinë e bashkëpunimit rajonal dhe ndërkombëtar, për të përballuar sfidat e përbashkëta. Theksova rëndësinë e aleatëve tanë strategjikë, si Britania e Madhe dhe Shtetet e Bashkuara të Amerikës, të cilët kanë qenë dhe vazhdojnë të jenë mbështetës të fuqishëm të aspiratave tona euroatlantike. Partneriteti ynë me Britaninë e Madhe dhe SHBA-të është një shtyllë e fortë që siguron paqen, stabilitetin dhe zhvillimin e qëndrueshëm në rajon dhe më gjerë”, ka shkruar Mexhiti në profilin e tij në Facebook.
Takimi i katërt i Komunitetit Politik Evropian ka mbledhur liderë nga i gjithë kontinenti në Pallatin Blenheim në Oxfordshire, Mbretëria e Bashkuar. Udhëheqësit po diskutojnë mbështetjen e vazhdueshme për Ukrainën, si dhe sfidat e përbashkëta si energjia dhe lidhja, siguria dhe demokracia dhe migrimi. BE-ja përfaqësohet nga Presidenti i Këshillit Evropian, Charles Michel, kurse të pranishëm janë edhe 47 drejtues shtetesh dhe qeverish evropiane, midis të cilave edhe Kosova.
Qëllimi i Komunitetit Politik Evropian është të nxisë dialogun politik dhe bashkëpunimin për të adresuar çështjet me interes të përbashkët dhe të forcojë sigurinë, stabilitetin dhe prosperitetin e kontinentit evropian.
Kjo platformë për koordinim politik nuk zëvendëson BE-në apo ndonjë strukturë tjetër, por është dizajnuar të shërbejë si një platformë që do të përshpejtojë integrimin evropiane të të gjitha vendeve aspirante.
KPE deri më tani ka pasur tri takime. Në takimin e parë në tetor 2022, udhëheqësit diskutuan kryesisht çështjet e paqes dhe sigurisë, veçanërisht luftën e Rusisë në Ukrainë dhe krizën energjetike. Në takimin vijues në qershor 2023, ata diskutuan përpjekjet e përbashkëta për paqen dhe sigurinë, qëndrueshmërinë e energjisë dhe lidhjen dhe lëvizshmërinë në Evropë. Në tetor të vitit 2023, udhëheqësit diskutuan se si ta bëjnë Evropën më elastike, të begatë dhe gjeostrategjike.
Shkruan: Xhelal Neziri – redaktor dhe bashkëpunëtor i The Geopost nga Shkupi
